Vielha e Mijaran suspenerà eth crubament dera taxa des terrasses en 2021

Vielha e MijaranEr Ajuntament de Vielha e Mijaran a decidit prorogar era supression deth crubament dera taxa d'aucupacion des terrasses as establiments ostalèrs entà 2021, en tot aleugerir era carga tributària a d'aguest sector greument afectat pes barraments impausats pes autoritats sanitàries deuant eth covid-19 a compdar deth passat mes de març. Damb aguesta decision s'amplie era suspension d'aguesta taxa que ja s'a hèt efectiua enguan arraïtz dera aparicion dera pandémia, en tot auer coma objectiu eth supòrt deth consistòri ena reactivacion economica deth municipi en aguesti moments plan dificils.

Junh a d'aguesta mesura, tanben se permeterà excepcionaument pendent era sason 2020/2021 era installacion de calefactors mobils enes terrasses, tostemp e quan se poguen trèir pera net entà sauvar-les. Atau madeish, se mantierà eth comitè de trabalh de terrasses establit enguan damb membres der Ajuntament de Vielha e Mijaran, deth Grèmi d'Ostalaria dera Val d'Aran e deth Conselh dera Vila, e qu'a coma objectiu avalorar era modificacion e era concesion de naues licéncies de terrasses as establiments, en tot respectar es normatives de seguretat vigentes.

Ath delà, er Ajuntament tanben implementarà ua naua ajuda dirigida as empresaris e autonòms deth municipi a compdar deth pròplèu mes de gèr, entà ajudar enes despenes qu'aguesti sectors agen agut entre es mesi de junh e deseme de 2020 a conseqüéncia dera pandémia. Aguesta serà era dusau ajuda ath sector empresariau que balhe eth consistòri, dempús dera partida de 50.000 èuros que ja destinèc a ajudar-le enes despenes d'EPIS e d'auti materiaus de proteccion qu'aueren de crompar pendent era declaracion der estat d'alarma entre es mesi de març e mai d'enguan.

“Des der Ajuntament de Vielha e Mijaran èm conscienti dera grèu situacion economica que patís eth sector toristic deth municipi, e dera importància que supause implementar tot aguest seguit de mesures, que de ben segur serviràn entà ajudar ena reactivacion economica pendent es pròplèu mesi”, comente eth baile de Vielha e Mijaran, Juan Antonio Serrano. E ahig que “de cara a 2021, seguiram en tot aplicar mès mesures entà ajudar a mès negòcis e a mès familhes a suportar er impacte d'aguesta pandémia, pr'amor que toti/es eri/es son era nòsta prioritat ara madeish”.