Vielha e Mijaran barre er exercici 2019 damb un superàvit de 809.671 euros

Vielha e MijaranEr Ajuntament de Vielha e Mijaran a barrat es compdes der exercici 2019, aprovats en plen ordinari d’aguest dimèrcles, damb un superàvit de 809.671 euros. Aguest superàvit "s’a artenhut sense auer d’augmentar es impòsti ara ciutadania e en tot mantier eth deute zèro, en tot garantir ua economia municipau sanejada" hig er Ajuntament. Ara, eth consistòri ei ara demora de qu’eth govèrn espanhòu autorize era inversion deth superàvit en accions financerament sostenibles, "des quaus s’en beneficiaràn es vesins/ies de Vielha e Mijaran".

“Eth superàvit confirme era bona gestion que realizam en Ajuntament enes darrèri ans, e que mos permeterà contunhar en tot desvolopar accions financerament sostenibles en municipi, quan eth govèrn espanhòu mos ac autorize”, comente eth baile de Vielha e Mijaran, Juan Antonio Serrano. E hig que “aguest resultat, en tot auer-se artenhut sense augmentar era carga fiscau dera ciutadania, garantís ua economia municipau sanejada”.

En plen tanben s’a aprovat era desafectacion dera bastissa deth carrèr Sarriulèra, 12, de Vielha a on s’i trape actuaument era Oficina Tecnica. En aguest sens, era bastissa qu’ère catalogada coma ben patrimoniau, ara passe a èster enregistrat coma servici public. Damb aguest cambi en inventari, eth consistòri poirà accedir a naues linhes d’ajudes e subvencions entà poder melhorar er equipament, e ath madeish viatge, melhorar es servicis tecnics e administratius. Ath delà, en plen tanben s’a aprovat eth calendari de hèstes locaus des diuèrsi pòbles de Vielha e Mijaran entà 2021.