Vielha e Mijaran barre es equipaments municipaus entà contier er expandiment deth covid-19

Vielha e MijaranEr Ajuntament de Vielha e Mijaran a comunicat eth barrament des equipaments municipaus (Bibliotèca Generau de Vielha, Palai de Gèu e Era Audiovisuau) pendent 15 dies, a compdar d'aué, entà contier er aument de contagis deth COVID-19 en municipi. A demana deth Conselh Generau d'Aran, degut ara situacion sanitària, er increment excessiu de contagis per COVID-19 e era activacion deth plan de contingéncia en Espitau Val d'Aran, eth baile de Vielha e Mijaran, Juan Antonio Serrano, a emetut un decrèt d'alcaldia en tot comunicar eth barrament d'aguesti espacis enquias 00:00 deth 9 de hereuèr.

“Èm en uns moments fòrça difícils a conseqüéncia d'un aument preocupant des contagis de COVID-19 en tota era Val d'Aran. Per aquerò, des der Ajuntament de Vielha e Mijaran, en tot èster conscienti dera gravetat dera situacion, auem decidit barrar temporaument es equipaments municipaus entà sajar d'esvitar mès positius, en aguest cas, en espacis barradi”, comente eth baile de Vielha e Mijaran, Juan Antonio Serrano. E ahig que “ei responsabilitat de toti/es lutar entà qu'es positius vagen en tot amendrir, de manèra qu'ei de besonh complir es mesures de prevencion establides pes autoritats sanitàries e extremar es precaucions enes contactes familhars e sociaus”.