Vielha e Mijaran adapte era dubertura des equipaments municipaus ara naua resolucion dera Generalitat
Era Bibliotèca e Era Audiovisuau dauriràn ath 50%, mentre qu'eth Palai de Gèu, eth Palai d'Espòrts e eth Centre Polivalent ac haràn ath 30%
Vielha e MijaranDeuant dera aplicacion dera resolucion de 5 de hereuèr deth Departament de Salut dera Generalitat de Catalunya entara contencion des bròts dera pandémia deth covid-19 en territòri, er Ajuntament de Vielha e Mijaran a adaptat es condicions de dubertura e aforament des installacions municipaus entre es dies 8 e 21 de hereuèr, qu’ei eth periòde que compren aguesta resolucion. D'aguesta manèra, es equipaments culturaus seràn dauridi ath 50% deth sòn aforament. Era Bibliotèca Generau de Vielha daurirà es sues pòrtes aguest dimèrcles 10 de hereuèr en sòn orari abituau, mentre qu'Era Audiviovisuau començarà a projectar pellicules a compdar d'aguest dissabte, 13 de hereuèr. En tot cas, entà complir damb eth tòc de queda, er orari limit d'aguesti espacis serà des 22 ores.
En çò que tanh as installacions esportiues, eth Palai de Gèu, eth Centre Polivalent e eth Palai d'Espòrts dauriràn damb un maxim deth 30% der aforament, e enes classes dirigides i poirà auer un maxim de 5 persones ath viatge. En tot moment serà obligatòri er emplec dera masqueta e en cas deth Palai de Gèu eth vestiari sonque le poderàn emplegar es usatgèrs dera piscina. Entà poder accedir a d'aguestes installacions esportiues calerà demanar cita prealabla. Ath delà, entà poder complir damb er orari deth tòc de queda, qu'encara demore vigent, es equipaments barraràn entàs 21 ores.
D'aute biais, es equipaments esportius que son ar aire liure auràn un aforament maxim deth 50%, e es parcs infantils mantieràn eth sòn orari de dubertura enquias 20 ores. Coma ja ère abituau abantes d'aguesta resolucion, e seguís vigent tanben ara, autant eth Casau deth Jubilat “Sant Miquèu” de Vielha coma eth Centre de Joenessa “Antara”, demoren barrades ath public enquia nau avís.
