Se reprenen es visites familhaus ena Residéncia Sant Antòni

Vielha e MijaranEra Residéncia Sant Antòni de Vielha a reprenut aguest dimars es visites as usatgèrs e usatgères deth centre, dempús d’auer estat catalogada coma centre iranja peth Departament de Salut dera Generalitat. Pr’amor d’aguesta catalogacion, se daurissen tanben es espacis comuns deth centre, dempús de quauques setmanes sense auer podut recéber visites ne hèr a servir aguesti espacis.

Per motius de seguretat, se mantieràn es protocòls establidi pes autoritats sanitàries, en tot mantier es unitats de convivéncia, sauvar es distàncies e hèr usatge des dispositius de seguretat (masquetes, guants, mampares de policarbonat). Actuaument, lèu era totalitat des residents deth centre de dia e residents, coma personau sanitari e essenciau dera Residéncia an recebut dejà es dues dòsi dera vacuna de Pfizer contra eth covid-19, en tot obtier atau era immunitat de grop.