GuidAran, era naua app de torisme dera Val d’Aran

Vielha e MijaranEth sindic d’Aran, Francés Boya, e eth conselhèr d’Economia, Torisme e Promocion economica, Juan Antonio Serrano, an presidit aué era presentacion dera naua app de Foment Torisme Val d’Aran, GuidAran, que permeterà as usatgèrs conéisher en detalh era Val d’Aran e accedir de manèra facil e intuitiva a tota era informacion sus es punts d’interès naturau e culturau, musèus, auviatge, rotes de senderisme e ciclisme.

Era app a estat creada pes aranesi Álvaro Ariño e Joan Carabias, dus joeni estudiants d’enginheria informatica e torisme, damb era collaboracion deth geològ aranés, Dani Gavaldà. Eth síndic d’Aran afirme que: “des deth govèrn deth Conselh Generau d’Aran auem un fèrm compromís damb era retencion deth talent des nòsti joeni”, e hig que: “damb eth desvolopament de GuidAran artenhem generar valor en airau de torisme, mès tanben enes airaus de tecnologia e innovacion, e aguesta apòsta ei clau entà desvolopar un modèl territoriau de futur entara Val d’Aran”.

Aguesta app dejà ei disponible entà Android e iOS ena sua prumèra version, ena que s’anaràn introdusint cambis, e higent informacion e naues foncions.