Es glèises de Salardú e Vaquèira poiràn acuélher eveniments non religiosi

SalardúEth plen der Ajuntament de Naut Aran a aprovat aguest maitin damb es vòts a favor de Convergéncia Aranesa e es vòts en contra d'Aran Amassa e Unitat d’Aran, era cession d'usatge dera glèisa de Sant Andreu de Salardú e deth sòn cementèri, autant coma era glèisa de Baqueira. En aguest sens, eth convèni contemple qu'eth Bisbat d'Urgelh permete hèr usatge d'aguest espaci ath consistòri dera forma que considère, quan volgue, pendent un periòde de 50 ans. Gràcies ad aguesta aprobacion, se regularizarà er usatge d'aguest temple culturau entara realizacion d'eveniments coma bèth concèrt o exposicions, o ben, promòir eth sòn campanau entà convertí'c en un atractiu toristic entà visitar sustot ena sason d'ostieu e tardor.

Segontes eth baile de Naut Aran, César Ruiz-Canela, “dempús de mès de 3 ans de negociacions damb eth bisbat, mos trapam dauant d’ua grana oportunitat entà poder potenciar era nòsta cultura e auviatge. Pendent aguesti darrèri ans, auem apostat fòrt per aguest airau e volem contunhar apropant aguesta classa de torisme ath nòste territòri”. Ath delà, ena session plenària, tanben s'an aprovat d'auti ahèrs urbanistics coma era creacion d'un nau carrèr ena poblacion d'Arties o er ampliament dera planta d'àrids d'ua enterpresa de construccion plaçada en municipi.