Eth Palai d'Espòrts de Vielha acuelherà temporaument bona part des activitats dirigides deth Palai de Gèu
Dempús deth sòn barrament a conseqüéncia des grèus damatges que patís ena sua estructura
A compdar deth pròplèu deluns 19 d'abriu, es usatgèrs deth Palai de Gèu poderàn repréner bona part dera sua activitat esportiva, en tot emplegar eth Palai d'Espòrts de Vielha de manèra temporau. Er Ajuntament de Vielha e Mijaran a aprovat un plan de gestion alternatiu entà qu'aguesta installacion, plaçada ath cant deth Palai de Gèu, pogue acuélher bona part des activitats dirigides que èren abituaus en Palai de Gèu, dempús deth sòn barrament a conseqüéncia des grèus damatges que patís ena sua estructura.
Entà poder garantir un corrècte emplec des installacions, s'a plaçat un contròl d'accès en vestibul deth Palai d'Espòrts que serà operatiu des 08:00 as 21:00 de deluns a diuendres. Cau rebrembar qu'es usatgèrs auràn de seguir es normes vigentes de prevencion deth covid-19 enes centres esportius, e qu'auràn de demanar cita prealabla entà poder reservar plaça en quinsevolha activitat ena que volguen participar.
Era pista poliesportiua deth Palai d'Espòrts acuelherà era practica deth karate, mentre qu'era sala esportiva acuelherà es activitats dirigides deth maitin (Entrenament foncionau muscular, Stretching, Gimnàsia de mantenement dera gent grana e Iòga) e dera tarde “Baisha Intensitat” (Stretching e Iòga) e “Nauta Intensitat” (Power Dump e Entrenament a intervaus de nauta intensitat: Burn Fat, Tabata, Entrenaments en suspension, Abdominaus e Body Workout).
Ath delà, en exterior deth Palai d'Espòrts se realizaràn es activitats de Running e Legs Workout, mentre qu'era EMD de Betren a cedit era planta superiora dera Sala Sociau entà realizar era practica deth spinning. Atau madeish, tanben se poderà emplegar eth gimnàs qu’ei dehòra dera estructura deth Palai de Gèu e compde damb un accès independent des deth Palai d’Espòrts, a més a més dera pista de frontón e dera pista de pádel. Enquia nau avís, demoren arturadi es servicis des piscines interiores e era pista de gèu.
Aguesta naua prepausa de distribucion des activitats esportives serà vigenta enquiath pròplèu 4 de junhsèga. “Damb aguesta prepausa alternativa de calendari d'activitats dirigides qu'auem plaçat en Palai d'Espòrts, volem qu'es usatgèrs poguen seguir en tot practicar espòrt coma ère abituau abantes deth barrament deth Palai de Gèu, damb era maxima aufèrta possible, mès en tot garantir era sua seguretat e integritat fisica”, comente eth segon tinent d’alcalde e còsso d’espòrts der Ajuntament de Vielha e Mijaran, Alberto López López. E ahig que “volem arregraïr ara EMD de Betren per cedir ua part dera Sala Sociau entà acuélher eth spinning, pr'amor qu'era proximitat respècte ath Palai d'Espòrts, permet poder desvolopar aguesta activitat enes melhores condicions possibles”.
