Eth HUB d’innovacion rurau HèPic collaborarà damb era Organizacion Mondiau deth Torisme
Se higerà ara estructura dera OMT tà formar part deth jurat dera sua Competicion de Torisme Rurau
Vielha e MijaranEra sindica d’Aran, Maria Vergés, eth secretari generau entath Rèpte Demografic, Francés Boya, eth conselhèr d’Economia, Torisme e Promocion economica, Juan Antonio Serrano, er alcalde d’Aínsa, Enrique Pueyo, e er equip tecnic de HèPic, s’an amassat aué damb era directora d’Estrategia en Innovacion, Educacion e Inversions dera Organizacion Mondiau deth Torisme (OMT), a qui an presentat eth projècte deth HUB d’innovacion rurau en territòris de montanha, HèPic.
En aguesta amassada, s’a acordat qu’eth HUB HèPic se higerà ara estructura dera OMT entà formar part deth jurat dera Competicion de Torisme Rurau prebotjada pera Organizacion, ua competicion qu’a coma objectiu promòir projèctes innovadors en ambit deth torisme entà generar solucions as rèptes as qu’an de hèr front es territòris ruraus.
“Aguesta collaboracion de HèPic damb era OMT comportarà qu’es projèctes innovadors presentadi ena Competicion de Torisme Rurau poguen èster aplicadi ath desvolopament des rèptes des territòris que formen part de HèPic, coma son era Val d’Aran e Aínsa”, explicaue eth secretari generau entath Rèpte Demografic.
Era sindica d’Aran manifestaue que “entath nòste territòri aguesta ei ua grana oportunitat de diversificar eth modèu economic dera Val d’Aran, mès tanben d’impulsar era digitalizacion, era innovacion e era sostenibilitat ath nòste modèu toristic”.
