Eth Conselh Generau inície ua campanha de promocion toristica dera Val d’Aran coma destinacion d’iuèrn

Vielha e MijaranEth Conselh Generau d’Aran, a trauès de Foment Torisme Val d’Aran, a iniciat aguesta setmana ua naua campanha de promocion toristica entà promòir eth territòri coma destinacion d’iuèrn ena qu’amiar a tèrme ua grana varietat d’activitats entà gaudir dera natura en iuèrn.

“Er esquí ei e serà eth principau atractiu dera Val d’Aran pendent er iuèrn, mès auem de besonh dar a conéisher as visitants d’autes activitats de nhèu e atractius diuèrsi qu’eth nòste territòri aufrís pendent aguesti mesi”, afirme eth vicesindic d’Aran e conselhèr d’Economia, Torisme e Promocion Economica, Juan Antonio Serrano, “ath delà, era Val d’Aran aufrís tanben era possibilitat, quan es condicions meteorologiques ac permeten, de practicar d’autes activitats coma eth ciclisme, qu’ei a dia d’aué ua des activitats damb mès demanda en territòri, era escalada o eth senderisme, entre d’autes”.

Damb era pròplèu e demorada arribada dera nhèu, eth vicesindic destaque que “auem un ampli ventalh d’itineraris aptes entà toti es nivèus tà gaudir damb raquetes o esquí de montanha des nòsti impressionants paisatges; s’aufrissen tanben activitats coma er eliesquí o passejades damb mòtos de nhèu o damb trinèus tiradi per cans, sense desbrembar-mos des nòsti pòbles e eth sòn auviatge naturau e culturau, era amplia aufèrta gastronomica des nòsti parçans o eth comèrç locau e era artesania”, en tot híger que: “tot açò hè dera Val d’Aran ua destinacion de nhèu perfècta entà gaudir dera natura, er aire liure e era nhèu de formes diferentes”.

“Auem hèt ua inversion de 70.000 euròs entà promocionar era Val d’Aran enes principaus mieis de comunicación digitaus e radiofonics de Catalunya pendent es mesi de deseme a abriu”, explique eth conselhèr d’Economia, Torisme e Promocion Economica, Josep Canut, higent que: “es donades d’aguest ostiu an mostrat un creishement important de visitants procedents dera rèsta de Catalunya e, degut ara actuau situacion e possibles scenaris, credem qu’ei fonamentau sajar de incentivar eth torisme de proximitat pendent aguesta tempsada”.