Eth Conselh Generau presente eth nau HUB d’innovacion rurau en zònes de montanha

Vielha e MijaranAguest dimèrcles auec lòc era presentacion telematica de HèPic, eth HUB d’innovacion rurau en zònes de montanha plaçat ena Val d’Aran. Aguesta presentacion siguec presidida pera sindica d’Aran, Maria Vergés, e eth secretari generau entath Rèpte Demografic, Francés Boya, e compdèc damb era preséncia des tecnics e tecniques ath capdeuant deth projècte, que expliquèren coma s’a bastit e en qué consistís HèPic, e era sua relacion damb eth projècte Aran Accion 20/30.

“Der inici dera legislatura ençà, des deth govèrn deth Conselh Generau d’Aran trabalham entà possar ua estrategia que facilite un procès de diversificacion dera economia aranesa”, asseguraue era sindica d’Aran, en tot híger que: “era actuau pandemia a metut de manifèst qu’aguesta diversificacion ei mès de besonh que jamès e, pr’amor d’açò, inicièrem en abriu eth procès participatiu Aran Accion 2020/2030, en quau ath torn de 200 persones dera Val d’Aran debateren sus eth modèu economic aranés e es besonhs e oportunitats que presente eth territòri”.

En aguest procés participatiu, explicaue Vergés “se metec de manifèst eth besonh d’implementar era innovacion coma metodologia entà arténher objectius coma era diversificacion economica, era retencion e captacion deth talent, era atencion as persones e eth profitament des recorsi locaus, entre d’auti”, e higie que: “gràcies ara iniciativa Aran Accion 2020/2030 se determinèc qu’era melhor forma entà dar responsa as besonhs dera Val d’Aran ère era creacion d’un HUB d’Innovacion rurau en zònes de montanha, qu’ath delà de desvolopar projèctes pionèrs e de valor en Aran e d’auti territòris de montanha, cree un modèu de referéncia en matèria d’innovacion en tot er Estat”.

HèPic, eth prumèr HUB d’innovacion rurau en zònes de montanha

Un HUB ei un espaci fisic e virtuau a on es persones emprenedores, administracions, empreses e inversors s’amassen en tot fomentar eth trabalh collaboratiu, era co-creacion e er aprenedissatge. Un hilat a trauès deth quau generar oportunitats de negòci innovadores e qu’aufrirà supòrt e orientacion as emprenedors e empreses emergents que volguen desvolopar projèctes innovadors e de valor.

Eth secretari generau entath Rèpte Demografic explicaue que “HèPic ei eth prumèr HUB d’innovacion rurau centrat en zònes de montanha, ei fisicament plaçat ena Val d’Aran mès es sòns projèctes an d’èster replicables en d’auti territòris de montanha, a d’èster un exemple a projectar en tot eth país e esdevier un referent que servisque entà ajudar a afrontar es risqui e problematiques consolidades que’afècten as territòris ruraus de montanha”.

En aguest sens, Boya afirmaue que: “eth propòsit de HèPic ei arténher era diversificacion economica des territòris de montanha coma era Val d’Aran de forma sostenible a trauès dera innovacion, en tot crear naues oportunitats e retorn economic damb projèctes basadi ena innovacion en airaus coma eth torisme, er espòrt, era agricultura, era ramaderia, era atencion as persones, es energies renovables o era cultura, entre d’auti”.

Entà arténher es sòns objectius e esdevier un esturment transformador des societats ruraus de montanha ei primordiau compdar damb eth maxim supòrt d’administracions e teishit empresariau. HèPic ei ua iniciativa publico-privada impulsada peth govèrn deth Conselh Generau d’Aran e que compde damb eth supòrt e collaboracion deth Ministèri de Transicion Ecologica e Rèpte Demografic, era Deputacion de Lleida, era patronau PIMEC, era associacion d’empresaris Pallars Actiu e empreses d’implantacion nacionau e internacionau.

Projèctes innovadors en territòris ruraus de montanha

Pendent era amassada d’ager, se presentèren quauqui projèctes innovadors relacionadi damb era sinergia creada damb HèPic, as quaus aguest HUB poirà dar supòrt e visibilitat. Ei eth cas deth simulador de rescats en montanha, que cerque balhar formacion especializada en aguest airau tant integrat ara activitat deth país, ua formacion entà grops de rescat fòrça nauedosa a nivèu europèu e ena quau dejà se trabalhe. Se presentèc tanben era empresa tecnologica emergent Maladeta Studio, qu’aufrís era possibilitat de dessenhar e crear apps, webs o jòcs, entre d’auti productes tecnologics. En darrèr lòc se presentèc tanben eth projècte de District Heating ena Val d’Aran, que trabalhe entà perméter substituïr es energies fòssils per energies renovables autoctònes.

Es persones qu’agen ua idèa o projècte e siguen interessadi en formar part de HèPic, pòden contactar damb es tecnics ath cargue a trauès der email info@hepic-hub.org.