Eth Conselh Generau e es Ajuntaments acòrden per unanimitat anullar es hèires ramadères d’enguan en Aran

Vielha e MijaranEth Conselh Generau d'Aran e es Ajuntaments acòrden per unanimitat anullar es hèires ramadères d’enguan. Eth sindic d’Aran, Francés Boya, era conselhèra d’Igualtat, Salut e Benèster, Maria Vergés, e eth conselhèr de Territòri, Paisatge e Gestion Ambientau, Francés Bruna, s’an amassat aguest maitin damb es alcaldes de Les, Andreu Cortés, de Bossòst, Amador Marqués, de Vielha e Mijaran, Juan Antonio Serrano, e de Naut Aran, Cesar Ruiz-Canela, entà tractar sus era celebracion des hèires ramadères qu’an lòc cada an en aguesti municipis.

“Per responsabilitat, autant eth govèrn deth Conselh coma es ajuntaments auem decidit qu’era melhor decision entath conjunt deth territòri ei anullar enguan es tradicionaus hèires ramadères que s’aurien de celebrar enes pròplèus setmanes en Les, Bossòst, Vielha e Salardú” explique eth sindic d’Aran, en tot híger que: “ei primordiau entà nosati preservar era salut publica e entad açò ei de besonh evitar es aglomeracions que normaument se viuen en aguesti eveniments, en tot redusir atau eth risc de possibles rebròts deth covid-19”.

Eth sindic d’Aran a arregraït er esperit de collaboracion des alcaldes que son tanben conscients deth besonh d’èster prudents deuant dera situacion actuau.