Eth Conselh dera Vila de Vielha e Mijaran constituís era Comission dera nhèu

Aguest dimars s'an reprenut es amassades deth Conselh dera Vila, que s'auien arturat pera aparicion dera pandémia deth covid-19. En aguesta reünion qu'a agut lòc ena Sala de Plens der Ajuntament de Vielha e Mijaran e qu'a estat presidida peth president deth Conselh dera Vila e baile municipau, Juan Antonio Serrano, s'a constituït era comission dera nhèu. Er objectiu d'aguesta comission, que hè part d'aguest organ de participacion ciutadana, ei poder debàter mesures des der airau civic entà confeccionar un seguit de prepauses qu'an de servir entà melhorar eth servici de neteja e mantenement des accèssi, des carrèrs principaus e des trepadèrs de toti es pòbles deth municipi en iuèrn.

Eth trabalh dera comission a de servir entà poder prepausar un modèl entara gestion d’aguest servici de neteja dera nhèu entàs pròplèu ans e planejar ua actualizacion dera ordenança de convivéncia ciutadana qu'en sòn article 54 parle sus era neteja dera nhèu deth viadèr public.

Eth Conselh dera Vila ei eth maxim organ de consulta e participacion ciutadana creat en 2019, que s'amasse periodicament, que compde damb representants de diuèrsi sectors dera societat civiu entà establir ua vinculacion dirècta entre er Ajuntament de Vielha e Mijaran e era ciutadania, en tot tractar aqueri ahèrs que preocupen as vesins e vesies, en tot fomentar eth desvolopament deth municipi.

 Segontes eth baile de Vielha e Mijaran, Juan Antonio Serrano, “aguestes amassades permeteràn ar equip de govèrn préner decisions sus era gestion dera nhèu consensuades damb era ciutadania e poderam transméter es problèmes e dificultats damb es que mos trapam en dia a dia entà cercar solucions conjuntes” e ahig que “ei de besonh tornar a revisar era ordenança municipau que parle sus era gestion dera nhèu entà adaptar-la as tempsi actuaus e repréner es valors de convivéncia que i auie ans endarrèr”.